UNIVERSITY TEACHING HOSPITAL OF BUTARE(CHUB)
Quality health care, Training and Research

Umugoroba wo Kwibuka jenoside yakorewe abatutsi ku nshuro ya 24 muri CHUB:"Ni akaga gakomeye kubona muganga yishora muri Jenoside" Dr Sendegeya

Umuyobozi Mukuru w’Ibitaro bya Kaminuza bya Butare (CHUB), Dr Augustin Sendegeya, yavuze ko bibabaje kubona umuganga yica abo ashinzwe kuramira kandi yararahiriye gutanga ubuzima, ashimangira ko bikwiye gutanga isomo ku bakora umwuga w’ubuvuzi muri iki gihe.

 

Yabigarutseho ku italiki ya 10/05/2018 mu biganiro byatanzwe ku mugoroba wo  kwibuka ku nshuro ya 24 Jenoside yakorewe Abatutsi mu 1994 byatangiwe muri ibyo bitaro.

Dr Sendegeya yagaragaje ko muri Mata 1994 hari bamwe mu baganga bishe abarwayi kuri CHUB kandi bari bashinzwe kubavura no kubitaho.

 

Yagize ati “Ni akaga gakomeye kubona muganga yishora muri Jenoside, akica abantu ashinzwe kuvura kandi yararahiriye kuramira ubuzima bw’abantu. Byageze aho abarwayi babakuramo za serumu abandi bakabima imiti. Iyo tuganira duhora twibukiranya ko tugomba kwitwararika no kwirinda iki cyaha n’ikindi kibi cyose.”

Bamwe mu baganga bavuzwe mu bagize uruhare muri Jenoside yakorewe Abatutsi harimo Dr Sindikubwabo Théodore wabaye na Perezida wa Leta yiyise iy’Abatabazi, Prof Gatera, Dr Habarugira Pascal, Dr Nsengiyumva, Dr Munyemana Sostene, umugore witwaga Nduwamariya Jeanne hamwe n’umugabo we Ndindabahizi Jean Chrysostome, Dr GATSINZI Theophile, Dr Bigizimana Ignace, Dr Rwamucyo Eugene, Dr Ukobukeye Thomas n’abandi benshi tutavuze aha batanzwe mu buhamya butandukanye. Abo bose ngo biganjemo abari inzobere mu kuvura indwara z’abana, abagore ndetse no kubaga ariko batatiye igihango bishora mu bwicanyi.

Abaganga bo mu Bitaro bya CHUB bavuga ko kuba hari bagenzi babo bishoye mu bwicanyi bakica Abatutsi muri Jenoside babagaya ariko kandi babikuramo isomo ryo guharanira kunga ubumwe barwanya ingengabitekerezo ya Jenoside.

Imibare itangwa n’ubuyobozi bwa CHUB igaragaza ko mu gihe cya Jenoside hiciwe abarwayi, n’abarwaza barenga 200, ariko kugeza ubu abamaze kumenyekana amazina bagera kuri 87.

Abakoraga umwuga wo kuvura kuri CHUB bishoye mu bwicanyi bo umubare wabo nturamenyekana neza, ariko ubushakashatsi buracyakorwa kugirango abishoye muri jenoside yakorewe abatutsi muri mata 1994 bakoreraga CHUB bamenyekane, bahanwe kandi nibagira n’umutima wo kwigaya bigaye!